किरात आवाज 
माङ्सेबुङ । इलामको माङसेबुङ ५ स्थित प्रस्तावित आत्मानन्द रंगशालामा भोलि शुक्रबारदेखि शुरु हुने आत्मानन्द कप खेलकुद प्रतियोगिताको तयारी पूरा भएको छ ।
किरात धर्मगुरु मुहिङगुम अङसीमाङ लिङदेन आत्मानन्द सेइङ ज्यूको ७० औं शुभजन्मोत्सव तथा मुहिङगुम अङसीमामाङ साँबा पवित्रहाङमा लिङदेन नुमाङगेन्ना सेवाको अवसरमा मंसिर ८ देखि १७ मंसिरसम्म सञ्चालन हुने खेलकुद प्रतियोगिताको तयारी पुरा भएको हो ।
Advertisement
माङसेबुङ गाउँपालिका अध्यक्ष हेमन्त राईको प्रमुख अतिथ्यमा प्रतियोगिताको उद्घाटन कार्यक्रम हुने खेलकुद प्रतियोगिताको तयारी पुरा भएको आत्मा पवित्र हक्चात यक्चुमका अध्यक्ष मनकुमार आङबुहाङले बताए । आत्मानन्द खेलमैदानमा सञ्चालन हुने प्रतियोगिताको उद्घाटन खेल माङसेबुङ गाउँपालिका खेलकुद समिति माङसेबुङ इलाम र वि.वाई.सी भुटानवीच भोली अपरान्ह २ वजे शुरु हुने अध्यक्ष आङबुहाङले बताएका छन् ।
प्रतियोगिताका विजेता टिमले नगद ३ लाख ११ हजार १ सय ७० रुपैयाँ र उपविजेता टिमले नगद २ लाख पाचँ हजार १ सय ७० रुपैयाँ सहित ट्रफी र प्रमाणपत्र पाउनेछन् । अतिरिक्त तर्फ म्याराथन, लठ्ठा तान्ने, हाँडी फुटाउने, पक्लुङ छेलो, धनुकाँण, कराते, भलिबल लगायतका खेलहरु समेत सञ्चालन हुनेछ । प्रतियोगिता सञ्चालनका लागि करिब ३० लाख खर्च लाग्ने अनुमान गरिएको अध्यक्ष आङबुहाङले बताए । त्यसका लागि किरात धर्मावलम्बी भक्तजन र विभिन्न खेलप्रेमी व्यक्ति तथा संघसंस्थाबाट आर्थिक सहयोग संकलन गरिने अध्यक्ष आङबुहाङले बताए ।
२०६५ सालमा मुहिङगुम अङसीमाङ लिङदेन आत्मानन्द सेइङको ५५ औं शुभजन्मोत्सवको अवसरमा २० हजार ५५ रुपैयाँ पुरस्कार राशीबाट थालनी गरिएको यस आत्मानन्द कपको नगद पुरस्कार राशी यसवर्ष ३ लाख ११ हजार १ सय ७० रुपैयाँ पुगेको हो ।
